1. வேற்றுமையின் வகையும் தன்மையும்
2. வேற்றுமை ஏற்கும் பொருள்
3. வேற்றுமையின் முடிக்கும் சொல்
4. வேற்றுமையில் வலிமிகுமிடங்கள்
என்னும் நான்கு பொருண்மையில் வேற்றுமை குறித்து விரிவாகவும் விளக்கமாகவும் அறிந்துகொள்வோம்.
வேற்றுமை என்றால் என்ன?
பெயர்ச்சொல்லின் இறுதியில் நின்று பெயர்ச்சொல்லின் தன்மையை வேறுபடுத்திக்காட்டுவதே வேற்றுமை எனப்படும்.
வேற்றுமை எட்டு வகைப்படும்
எழுவாய் வேற்றுமை
இரண்டாம் வேற்றுமை (ஐ)
மூன்றாம் வேற்றுமை(ஆல்)
நான்காம் வேற்றுமை(கு)
ஐந்தாம் வேற்றுமை(இன்)
ஆறாம் வேற்றுமை(அது)
ஏழாம் வேற்றுமை(கண்)
விளிவேற்றுமை.
வேற்றுமைகளுக்குரிய உருபுகள்
ஐ ஆல் கு இன் அது கண் ஆகியவை இரண்டுவேற்றுமை முதல் ஏழாம் வேற்றுமை வரையிலான ஆறுவேற்றுமைகளுக்குரிய உருபுகளாம்.
எழுவாய்வேற்றுமைக்கும் விளிவேற்றுமைக்கும் தனித்த உருபுகள் இல்லை.
எழுவாய் வேற்றுமை
எழுவாய் வேற்றுமைக்கு தனித்த உருபுகள் இல்லையெனினும் திரிபில்லாத பெயர்ச்சொல் தன்னுடைய பொருளை வினைமுதல்பொருளாக வேறுபடுத்துவதால் இதனை எழுவாய் வேற்றுமை என்பர்.
முருகன் - திரிபில்லாத இயல்பான பெயர்ச்சொல். தன்னளவில் எந்தச்செயலையும் நிகழ்த்தவில்லை
முருகன் வந்தான். - இத்தொடரில் 'முருகன்' என்னும் பெயர்ச்சொல் 'வந்தான்' என்னும் பயனிலையையேற்று வினைமுதற்பொருளாகிறது. அதாவது வருதல் என்னும் தொழிலைச்செய்யும் வினைமுதலாகிறது.
வினைமுதல், செய்பவன், கருத்தா இம்மூன்றும் ஒருபொருள் தருவன.
முருகன் என்னும் பெயர்ச்சொல் எழுவாய்த்தொடராகும்போது ஒருசெயலைச்செய்யும் கருத்தாவாக மாறுகிறது. இப்பொருள் மாற்றமே முதல்வேற்றுமை அல்லது எழுவாய்வேற்றுமையாகும். பெயரின் தன்மையை வேறுபடுத்தலால் இதற்கு பெயர்வேற்றுமை என்னும் பெயருமுண்டு .
எழுவாய் வேற்றுமையின் முடிக்குஞ்சொல்
எழுவாய் வேற்றுமையானது வினை பெயர் வினா இம்மூன்றையும் பயனிலையாகக்கொண்டு முடியும்.
சான்று
முருகன் நல்லவன் (பெயர்)
முருகன் வந்தான் (வினை)
முருகன் யார்? ( வினா)
